كرّر محاولتك في التشافي، ولكن هذه المرّة…
فهم الذات و التشافي علاقة طردية، لانك اذا بديت برحلة فهم الذات بتوصل للأمور اللي تحتاج تتشافى منها، اما اذا بديت برحلة التشافي بتتعمق في فهم ذاتك لأنك بتواجه نفسك، مشاعرك، تصرفاتك، و اختياراتك و كيف تكونت. فبأي رحلة تبدأ؟
الأمور المشتركة بين رحلة فهم الذات و رحلة التشافي
- يحتاجون صدق مع النفس، تكون حقيقي ما تزيّف الأمور وتعطيها ايحاء بانها افضل او اجمل.
- يخرجونك من منطقة راحتك، فتشعر بالتحدي لانك بتواجه مشاعر ممكن اول مره تحس فيها.
- كلهم عبارة عن رحلة وليس شي مؤقت، لأنك كائن حي تمر بتغييرات دائمة فطبيعي تكون في تغيير دائم يحتاج منك فهم وتشافي، فركز على الشي اللي يلامسك حاليا.
محطات رحلة فهم الذات
المحطات اللي ممكن تخليك تختار تتعمق في فهم نفسك:
- محطة الاجبار: تنحط في تجارب و مواقف تخليك مُجبر تفهم نفسك، مثلا تواجه موقف يحتاج قرار فوري، و تكتشف انك متردد و مب قادر تتخذ القرار.
- محطة الاختيار: انت بنفسك تقرر انك مستعد تفهم نفسك، فتاخذ اختبارات و دورات ممنهجة مثل دورة أفهم نفسك، لتفهم نفسك أعمق و تطورها.
- محطة الصدمة: تتعرض لمواقف صادمة تخليك تلامس نقاط الضعف عندك والأخطاء اللي تكررها لتختار انك تتنازل عنها، بعدها تنتقل لرحلة التشافي لتقوي نفسك وتتحرر من الالم وتختار الصفات الجديدة اللي ودك تتبناها.
محطات رحلة التشافي
المحطات اللي ممكن تخليك تختار التشافي:
- محطة الالم: تتعرض بشكل متكرر للالم او تحس بمشاعر سلبية مثل الخوف، الحزن، التأنيب، العار، وانعدام القيمة، فتختار رحلة التشافي لتتخلص من الألم و تحس بمشاعر سلام و طمأنينة.
- محطة الاختيار: انت بنفسك تختار تتشافى من أمور ممكن مافيها الم او المها بسيط لكنك تبغي تتطور أكثر من هذه الناحية، مثل تتحرر من معتقداتك المعرقلة عن المال لتوصل لمستوى مالي أفضل.
كيف تختار الرحلة الأنسب لك؟
- أسأل نفسك:
- هل التجارب المؤلمة اللي مريت بها لا زالت تؤثر على حياتك و قراراتك الحالية؟
- هل مشاعر الخوف، القلق، الحزن تؤثر على حياتك وتطورك فيها؟
- هل ودك توصل لحالة من الراحة و الطمأنينة؟
*اذا اغلب اجابتك نعم لهذه الأسئلة فرحلة التشافي لك
ممكن دورة تحدي 14 يوم للتشافي تساعدك في رحلتك للتشافي
- أسأل نفسك:
- هل ودك تتعرف على نقاط قوتك و ضعفك، وتتعلم كيف تطورهم؟
- هل ودك تعرف انت تتخذ تصرفاتك و قراراتك بناء على ماذا؟
- هل ودك تتقبل نفسك و تحترمها؟
*اذا اغلب اجابتك نعم لهذه الأسئلة فرحلة فهم الذات لك
ممكن دورة افهم نفسك تفيدك في رحلتك لفهم الذات
كيف تستمر في رحلة فهم الذات و التشافي بأقل قدر من الألم؟
الرحلتين فيهم تحديات و تتطلب المواجهة، ولتخلي الرحلة أكثر سلاسة استخدم الوسائل التالية:
- التدرج: لا تحاول تغيير كل شي مره وحده، إبدأ بالأهم و اللي يأثر عليك الحين و كمل بخطوات صغيرة و مستمرة. و لاتنسى تأخذ فترات راحة.
- قبول الالم: لا ترفض الالم لان بدونه ما كنت بتوصل للي انت فيه الحين، أقبل أن الألم جزء من رحلة التطور و التغيير، لكن لا تخلي الالم هو السبب الوحيد اللي يغيرك و يطورك.
- التركيز على الايجابيات: ركز على الامور الجيدة اللي صارت من المواقف والتجارب اللي تمر بها، احتفل بعد الجهد بالإنجازات الصغيرة والكبيرة لأن الاحتفال يخليك تقدر تواصل و تتقدم، اعتبر التحديات و الألم فرص للتعليم و استفيد من دروسها لانك بهذه الدروس انت بتتقدم ما بتعلق في احساس انك مظلوم.
- الاهتمام بالنفس: اهتم بروتينك و عاداتك، انتبه لنوعية اكلك، نومك، ورياضتك، لا تضغط على نفسك بالمسؤوليات والواجبات، و خصص وقت للراحة و المتعة.
- التسامح مع النفس: لا تقسى على نفسك وقت الخطأ و الفشل و تحكم على نفسك انك فاشل او ما تصلح لشي، كون لطيف معاها في الأوقات الصعبة، تعلم تكون مرن مع المتغيرات اللي تواجهها وانك ممكن ما تؤدي أفضل ما عندك في كل مرة.
- طلب الدعم: اختار أشخاص داعمين حولك وتعرف انهم بيدعمونك سواء كانوا اصدقائك، أشخاص من العائلة أو مختص يقدم لك الأدوات اللازمة.
رحلة فهم الذات والتشافي، رحلة ممتعة و مشوقة فيها جرأة و شجاعة و اهم شي انها رحلتك للتطور، فكرّر محاولتك في التشافي، ولكن هذه المرّة، افهم ذاتك أوّلاً.
استجابات